സൗദി അറേബ്യയിലും ബസുമതി റൈസിന്റെ ഇറക്കുമതി അവസാനിപ്പിക്കുന്നു

തിരുവനന്തപുരം: ഇന്ത്യയില്‍ നിന്നുള്ള ബസുമതി റൈസിന്റെ ഇറക്കുമതി പല യൂറോപ്യന്‍ രാജ്യങ്ങളും അവസാനിപ്പിച്ചതിന് പിന്നാലെ സൗദി അറേബ്യയും അവസാനിപ്പിക്കുന്നു. കാന്‍സറിന് കാരണമായേക്കാവുന്ന ട്രൈസൈക്ലസോള്‍ എന്ന കീടനാശിനിയുടെ സാന്നിധ്യം കണ്ടെത്തിയതിന് പിന്നാലെയാണ് ഇന്ത്യയില്‍ നിന്നുള്ള ബസുമതി റൈസിന്റെ ഇറക്കുമതി ഈ രാജ്യങ്ങള്‍ അവസാനിപ്പിച്ചത്. ഇന്ത്യയില്‍നിന്നുള്ള ബസുമതി അരിയുടെ കയറ്റുമതിയില്‍ 70 ശതമാനവും സൗദിയിലേക്കാണ്. ഏതാണ്ട് 12,000 കോടി രൂപയുടെ അരിയാണ് ഇന്ത്യ സൗദിയിലേക്ക് കയറ്റി അയക്കുന്നത്.

സൗദി കൂടി നിയന്ത്രണങ്ങള്‍ കൊണ്ടുവന്നത് സ്ഥിതി കൂടുതല്‍ വഷളാക്കിയിട്ടുണ്ടെന്ന് ബസ്മതി എസ്‌പോര്‍ട്ടേഴ്‌സ് അസോസിയേഷന്‍ പ്രസിഡന്റ് വിജയ് സേത്തിയ പറഞ്ഞു. ഇക്കാര്യത്തില്‍ കേന്ദ്രവും പ്രധാന ഉത്പാദന സംസ്ഥാനങ്ങളായ പഞ്ചാബും ഹരിയാണയും അടിയന്തര നടപടി സ്വീകരിക്കണമെന്നും അദ്ദേഹം പറഞ്ഞു. ആരോഗ്യത്തിന് ഭീഷണിയായ കീടനാശിനിയുടെ ഉപയോഗം അവസാനിപ്പിക്കാന്‍ എന്തുകൊണ്ട് കര്‍ഷകരെ ബോധവത്കരിച്ചുകൂടായെന്നും അദ്ദേഹം ചോദിക്കുന്നു. കര്‍ഷകരുടെ വയലുകളില്‍നിന്ന് ശേഖരിക്കുന്ന അരി പരിശോധിക്കാന്‍ അസോസിയേഷന്‍ തയ്യാറാണെന്ന് വിജയ് സേത്തിയ പറഞ്ഞു. കീടനാശിനിയുടെ സാന്നിധ്യം ഇല്ലെന്ന് ഉറപ്പുവരുത്തിയാല്‍ നിലവിലുള്ളതിനെക്കാള്‍ 10 മുതല്‍ 15 ശതമാനം വരെ വില കൂടുതല്‍ നല്‍കാന്‍ തയ്യാറാകണമെന്നും അദ്ദേഹം ആവശ്യപ്പെട്ടു.

ജനുവരിക്കുശേഷം 30 കണ്ടെയ്‌നറുകളാണ് കീടനാനിശിനിയുടെ പേരില്‍ തിരിച്ചയച്ചത്. നോര്‍വെ, സ്വീഡന്‍, ഇംഗ്ലണ്ട്, ഫിന്‍നന്‍ഡ് എന്നീ രാജ്യങ്ങളാണ് കണ്ടെയ്‌നറുകള്‍ തിരിച്ചുവിട്ടത്. കയറ്റി അയക്കുന്ന ബസ്മതി അരിയില്‍ 25 ലക്ഷം ടണ്ണോളം പഞ്ചാബിലാണ് ഉദ്പാദിപ്പിക്കുന്നത്. ട്രൈസൈക്ലസോള്‍ ഉപയോഗിക്കാതെ ബസ്മതി കൃഷി ചെയ്യുന്ന ജമ്മു കാശ്മീരിലേക്കാണ് കയറ്റുമതി രംഗത്തുള്ളവര്‍ ഇപ്പോള്‍ ഉറ്റുനോക്കുന്നത്. എന്നാല്‍, 25,000 ടണ്‍ മാത്രം ഉദ്പാദിപ്പിക്കുന്ന ജമ്മു കാശ്മീരിലെ മുഴുവന്‍ അരിയും കയറ്റുമതി ചെയ്താലും ആവശ്യത്തിന് തികയില്ല.

ഇന്ത്യയില്‍ നിന്നു വരുന്ന ബസ്മതി അരിയില്‍ കര്‍ശനമായ പരിശോധനകള്‍ നടത്താനാണ് സൗദി ഫുഡ് ആന്‍ഡ് ഡ്രഗ് അഡ്മിനിസ്‌ട്രേഷന്റെ തീരുമാനം. അത്തരം പരിശോധനകള്‍ ആരംഭിച്ചതായും റിപ്പോര്‍ട്ടുണ്ട്. കീടനാശിനിയുടെ സാന്നിധ്യം കണ്ടെത്തിയതിനെത്തുടര്‍ന്ന് ഇന്ത്യയില്‍നിന്നുള്ള ചില കണ്ടെയ്‌നറുകള്‍ തിരിച്ചയച്ചതായും റിപ്പോര്‍ട്ടുണ്ട്. ഒരു കിലോ അരിയില്‍ 0.01 മില്ലിഗ്രാം ട്രൈസൈക്ലസോളിന്റെ സാന്നിധ്യമാണ് യൂറോപ്യന്‍ യൂണിയന്‍ അനുവദിച്ചിട്ടുള്ളത്. അതേ മാനദണ്ഡം പിന്തുടരാനാണ് സൗദിയുടെയും തീരുമാനം.

from mangalam.com https://ift.tt/2ABCGEq
via IFTTT